تمام الحادية عشرصباحا - يوم 2/2
المكان
الأمريكين طلعت حرب وسط البلد
العملية
تفجير قنبلة موقوتة لمدونيين مصريين جمعهم فكر واحد وهو حب الوطن والتدوين
البداية
أنا أول من ينتظر ويراقب أمن الدولة مستنية ولا لأ ، ثم أنجرف نحو طلعت حرب وأنا في طريقي يجذبني شكل الأيس كريم أشتري واحد ب 2 ونص ( ضاعت فلوسك يا صابر.. ) بعد قليل تليفون (يا فتاح يا عليم يا رزاق يا كريم) مين ? جينا.... عظيم الطرف التاني في المهمة أنا جاي في السريع عند سينما مترو تليفون تاني رقم غريب لأ ده كده حرام ، أشوفه مستر نعماني ، بيقول لي أنت فين قلته له أنا مع جينا قال لي إذا كنت أنا مع جينا ( وشي إحمر ) تعالى بسرعة أوكي ...!( الطرف التالت) ........
إلتقينا بص لي (مستر نعماني ) بصة غريبة جينا سلمت عليا ، ومشيت أنا ومستر نعماني مدام نبيلة جت سلمت عليها ومش في دماغي وكان جنبها بنت مش فاكر سلمت عليها ولا لأ ( أصلي كنت مطبق ) مشيت ولقيت ناس ورانا جايين كأنهم بيقولوا هجوووووم .... أخد مستر نعماني وجرينا بحسب أمن الدولة طمني وقال لي : إنهم أصحابنا المدونين....
دخلنا الأمريكين وقعدنا علشان ندبر لمكيده وهي إننا نجتمع على قول لا إله إلا الله وأن نتفرق على محمد رسول الله وأن التدوين بيتنا وأن لا نفارقه إلا بالموت......
شويه وإتعرفت ع الرجالة
ودعوني أعرفكم عليهم حسب السن
المعلم نعماني
http://elnomany.jeeran.com المعلم النعماني صاحب مدونة روبابيكيا
رقم موبايله معايا علشان لو أصحابنا عاوزين تجيبوه بس على إيه ده ماشي جوه الحيط
تعرفي به
في البداية مكنتش بهضمه لله في لله ومن غير أي حاجة بس كنت بدخل مدونته أشوفها أقرا فيها موضوعات بس مش كتير ويوم الإجتماع لما كلمني قلت لما نشوف ، ولما شفته قلت مش ده اللي في الصورة الصراحة ( كده وكده ) الصورة أحلى ، بس والله لما سلمت عليه حسيت بإحساس غريب حسيت بعطف الأب اللي أنا مفتقده
الحاجة نبيلة غنيم
http://nabilagonem.jeeran.com الحاجه نبيلة غنيم - غنيه عن التعريف- صاحبة مدونة مؤلفات نبيلة غنيم
حرام عليكوا لو أخدتوا رقامها دي مدونتها إجتماعية وبتحاول تصلح في المجتمع وملهاش دعوة بحاجة
تعرفي بها
في مدونتها كنت بحس إنها إنسانة محظوظة وإستغربت من عدد محبيها ( مش حقد ولا حسد والله ) بس لما قابلتها لقيت فعلا إنه من حق الناس يحبوها بس أنا لما حبيتها حبيتها أكتر من الناس بكتير و حسيت إنها أمي ولحد ما أموت إن شاء الله وانا هقول لها يا" ماما نبيلة " وماما عندما تكلمت شعرت بصوت عصفوري يدخل أذني ويخرس صوتي .. مش عارف!
النايمة جينا
http://jena2006.jeeran.com النايمة جينا صاحبة مدونة همسات قلبية
ما أظنش إنه ينفع تاخدوها علشان كانت نايمة طول الإجتماع تصحى تقول كلمة وتنام لحد ما شعري وقف
تعرفي بها
إتعرفت عليها من فترة تقريبا الموضوع اللي كان بعد الإجتماع الأول ولما قريته حسيت بإرتياح شديد من كلماتها الجميلة اللي دخلت نغاشيش قلبي وحركت فيه شوية دم كانوا واقفين علشان كده حطيتها في مفضلتي تحت إسم "همسات قلبيه فيها تشعر بالإرتياح"
ولكن لظروف الشغل إنقطعت عنها وعن التدوين ولما إتفقنا على الإجتماع كنت في إشتياق لرؤيتها وكنت متخيلها غير ما شفتها.
الشيخة إيمان حسان http://totototototototototo.jeeran.com الشيخة إيمان حسان صاحبة مدونة إيمان حسان سابقا ومدونة المعتزة بدينها حاليا دي اللي ممكن تاخدوها علشان هي مش على هواكم بس للأسف مش معايا رقم تليفونها تعرفي بيها كنت مرهف بكلماتها قبل أن أراها ولكن لأني أصلا مكنتش بدخل المدونة بتاعتي فمكنتش بدخل مدونتها ولحد ما جه معاد الغجتماع وعرفت إنه إيمان حسان هتيجي ففرحت وإستغربت أول ما شفت " إيمان ذات الملحفة " ولأني الصراحة مكنتش قريت موضوع جاري حذف المدونة فمكنتش أعرف ولما عرفت إنها هتعمل مودونة توتوتو عشر مرات فهمت إيمان ذات الملحفة ، أتمنى أن تنجح وكلنا في إنتظار إيمان من جديد الغامض محمد المهدي http://deepvision.jeeran.com الغامض محمد المهدي صاحب مدونة ديب فيشن كنت أتمنى إنكم تاخدوه قبل الإجتماع بس بعد الإجتماع لقيت إنه لو عذبتوه لحد السنة الجاية إستحالة يعترف بكلمة لإنه مصري حتى النخاع تعرفي بيه دخلت مدونته فترة ما وكنت أقرأ له لحد ما حصل " تاتش" وإختلفنا ومكلمتوش من بعدها لحد يوم الإجتماع وإتصالحنا في وجهات النظر الصامت محمد حسن http://7ob.jeeran.com الصامت محمد حسن صاحب مدونة شاطئ الغرام مش هيفعكوا علشان إنتوا عاوزين واحد بجح لكن ده بيتكسف من نفسه تعرفي بيه صديقي وأخي إتكلمنا كتير ع الميل وكنا بنتبادل الأراء بننا على الإيميل وع المدونة ومن ساعة ما عرفنا بعض مفيش موضوع إلا وتبادلنا التعليقات ولما شفته مصدقتش لحد ما خرجنا من الإجتماع ونكشته بكلمه لقيته بيجيب فعرفته إنه بيتكسف يتكلم قدام البنات ومكنش في ظروف زي ما إدعى البعض واللي طلعت عليه إشاعات كتيره كده زي سفاح المعادي الطيب أحمد خيري http://hero21.jeeran.com الطيب أحمد خيري صاحب مدونة هيرو المدونة إسمها يخوف بس متقلقوش من أول قلم هيجيب تعرفي بيه إتعرفت على مدونته وقريت له شويه ولكن محصلش إندماج مش عارف ليه ؟ لحد ما شفته وحسيت إنه طيب خَلص بلاش أقول عليه أحمد مهدي http://mercyboy.jeeran.com أحمد مهدي صاحب مدونة ميرسي بوي جوعوه شوية وهو يعترف باللي حصل في الإجتماع تعرفي بيه مكنتش أعرفه ومعرفتش فيه إلا نفسك تبقى إيه في المستقبل سؤال الدائم ، وعرفت فيه الطيابة والنظرة المستقبليه الغريب مؤمن http://nesrelsharke.jeeran.com الغريب مؤمن صاحب مدونة نسر الشرق هيبعنا في ثانية تعرفي بيه دخلت مدونته مره قبل الإجتماع بس مقعدتش فيها كتير علشان إنشغلت ، إختلفنا في وجهات النظر في الإجتماع ولكن الحمد لله لم نختلف في المبدأ السوسه عماد http://emad203a.jeeran.com السوسه عماد صاحب مدونة كلمات بلا هويه هتحسبوا إنه هيعترف لكوا ولكن أول ما تضربوا هيعترف بس بكلام غلط وهيتوهكوا تعرفي بيه لم أعرفه من قبل ولكن لما عرفته عرفت إنه طيب ومبتسم " اللهم لا حسد " البسكوته هبه نظمي http://baskauta.jeeran.com البسكوته هبه صاحبة مدونة بسكوته هتعمل زي عماد تعرفي بيها لم أعرفها من قبل وكل ما عرفته عنها ان لها أراء صائبة ولكن مكتومة البرنسيسة زمرده http://zomorooda.jeeran.com البرنسيسه زمرده صاحبة مدونة زمرده مأظنش إنكم هتعرفوا تجيبوها لإنمها هتختفي أصلا تعرفي بيها كان لي قرأة لموضوعها الإخير ( قبل الإجتماع ) وسموها بسكوتة بس أنا عندي تحفظ وأسميها البرنسيسة علشان هادية ولصوتها المنخفض المجنون مادز http://mads.jeeran.com المجنون مادز صاحب مدونة مادز ده بقى بعد كلمة المجنون اللي انا قلتها له هيبعنا كلنا في ثانيه ( متزعلش يا مادز إني بقول لك مجنون بس غالبا العبقري بيبقى مجنون) تعرفي بيه قبل الإجتماع كنت اظن إنه أكبر مني كسن ، قرأت له عدت موضوعات وبعد موضوع الصرخة وجدته يختفي فمدخلتش مدونته لحد يوم الإجتماع ومن بعدها وأنا كل يوم هناك الشعنونة علياء شكر http://masriaeg.jeeran.com الشعنونة علياء شكر صاحبة مدونة مصرية تدافع عن قضية إستحالة تعترف علينا بس هتكتم وهتقر بعد كام يوم تعرفي بيها لحد يوم الإجتماع كانت مش في الذاكرة خالص وفي الإجتماع إعتبروها ضيف شرف بس أنا إعتبرتها مدونة قيدة الإنشاء فضلت ساكتة لحد ما إنفجرت وخلت الناس تبص عليها وأصبحت مدونة رائعة وسحبت من تحتنا الأضواء حتى من تحت الحاجة نبيلة ، في اليوم نفسه إختلفنا على عمل المدونة أم لا وبمجرد ما روحت عملت لها المدونة تاني يوم وأصبح مدونة ساحبة الأضواء في النهاية ربما تعجبتم مما كتبته على المدونين ولكن سبب ما كتبته حبي لهم وخوفي عليهم وحرصي الشديد على سلامتهم فكنت حابب أعرف أمن الدولة بعض الإنطباعات اللي أخدتها عنهم ، ربما يا أصدقائي منكم من سيغضب مما كتبت ومنكم من سيفرح ولكن بجد أنا بحبكم وده كان مجرد ترفيه وهزار بين إخوات مش مدونين أظن إننا عرفنا بعض وأتمنى إنه ميفرقناش إلا الموت ، كذلك لي رسالة أود أن أظهرها للجميع أن هناك من شكر فيا وشعرت أنه بالغ في شكري فأنا لا أستحق ذلك بجد ، وهناك من أعاب عليا أو إختلف معي فقلت له ( لولا إختلاف النظرات لماتت الحشرات ) ووضحت له وجهة نظري لكن بجد سعدت ممن أظهر عيوبي حتى أصلحها وأنا الأن قيد التصليح .. ونهاية النهاية لن أقول شكرا أعزائي الجيران بل أقول شكرا إخواني الكرام ... وفي إنتظار مغامرة أخرى المخلص كريم الشيخ سفاح المعادي سابقا مغامر جيراني حاليا
أضف تعليقا
من مصر
حرام عليك ياكريم
بتسلمنا
انا معرفش انك مرشد
يا ابني انته بتدي معلومات كاننا مجرمين
احنا غلابه والله
بس انته مش غلبان اناح ابلغ عنك مخابز الامن الغزائي
والامم اللي متعرفش بعضها
ومجزمات المجتمع الميري والغجري وكل البلاوي الزرق
بقه كت بتجاملني
ماشي
ولما كلمتك مقلتليش اجي اكل ايس كريم ليه
والا عشان انته كلريم وهوه ايس كريم تبقوا عيله واحده ومش عاوز حد يتدخل بينتكم
انا ح اعمل ايس محمود
خف شويه يا كرمله
تحياتي والى الملتقى
وانتظرك هناك جديد
من مصر
حرام عليك ياكريم
بتسلمنا
انا معرفش انك مرشد
يا ابني انته بتدي معلومات كاننا مجرمين
احنا غلابه والله
بس انته مش غلبان اناح ابلغ عنك مخابز الامن الغزائي
والامم اللي متعرفش بعضها
ومجزمات المجتمع الميري والغجري وكل البلاوي الزرق
بقه كت بتجاملني
ماشي
ولما كلمتك مقلتليش اجي اكل ايس كريم ليه
والا عشان انته كلريم وهوه ايس كريم تبقوا عيله واحده ومش عاوز حد يتدخل بينتكم
انا ح اعمل ايس محمود
خف شويه يا كرمله
تحياتي والى الملتقى
وانتظرك هناك جديد
من مصر
بسم الله الرحمن الرحيم
أخي كريم الهراب الحمدلله أني ما سمعتش كلامك
وحضرت اللقاء كان زماني أتفضحت أيه يابني الملحمة ديه وبتئول عليا خياليه
ولا أكيد أنت كتبت المقاله ديه بعد أكلة
محشي الشبت جميل كريم في أسلوبك بتفكرني
بأبني أما يحكيلي حدوتة لكن بجد أتجنن على جناني وأحضر معاكم اللقاء الجاي
بس الحمد لله ماحدش يعرف عني ولا هيعرف عني حاجه يعني لو فضحتني
(أنا مش أنا)
من مصر
يا سيادة القائد نعماني خلي عنك أنا اللي هبلغ عنه أنا أولى ده وهمني أنه هيهد الكره الارضيه ويرجعها تاني وخلاني في رعب وعيشني الوهم وكل يوم أصحى من نومي أهدف الصرخه الصرخه
كريم الشيخ الصرخه كريم الشيخ بجماهيييييييييييير تهدف الحريه الحريه
أتااااااااري الاستاذ رايح حرب الآيس كريم وعلياء حببتي بتشكريه ده بيئول عليكي شعنونه هههههه ربنا يديم الحب والموده والسعاده يارب أمتعتنا يا كريم
من مصر
صحبى جميل كيمو:
بجد كلامك جامد جدا ومدونه رائعه بكل مقلاتها صراحه وربنا معاك ويوقفك
سلام ياصحبى
من مصر
أخى العزيز / كريم الشيخ
عجبتنى حكاية الشيخة ذات الملحفة ، جميلة بجد وأتمنى أكون فعلآ كدة .
كدة برضة تبلغ عنى ، ماشى يا مان على أى حال إحنا رجالة وقدها ولا يهمك ، بس بجد إنت اللى كنت مفاجأة ، إعتقدت إنك فعلآ نفس الكراكتر دة ، لكن المفاجأة إن كلامك فى اللقاء كان أكبر من سنك بمراحل بجد ماشاء الله عليك ، خليتنى أحس إن شبابنا لسه بخير طول ما فيه كريم الشيخ ومادز وغيرهم كتير بنفس الوعى الثقافى والطموح الذى لا جدران ولا سقف له .
أتمنى لك تحقق كل أحلامك وطموحك وصوتك يعلا أكتر وأكتر وأنا عن نفسى معاكم من غير خوف حتى لو مصيرنا فين هايكون .
المهم صوت الحق يزيد ويعلا كمان وكمان .
من مصر
مدونتك رائعة يا اخي وبجد انا نفسي تشرفني وتدخل تزور مدونتي وتبدي رايك اذا سمحت ووفقك اللة انت وكل الذين تكلمت عنهم
من مصر
أخى العزيز كريم
هو فعلاً كان مغامرة ومهمة صعبة كمان .. بس بجد كان أسلوبك شيق جداً فى صيغتك للموضوع .. وعلى فكرة لو ربنا قدر لية أكون معاكم فى اللقاء القادم هوريكم الوش التانى.. وبجد وحشتينى أوى
ومعلش يا كريم على التأخير بس بجد والله يا كريم حالتى النفسية سيئة جداً وهى من الأسباب اللى خلتنى ساكت طول اللقاء لأنى مكنتش قادر أركز .. وأكيد إمن عارف بهدلة الجيش يكفى إنى المفروض أكون فى الجيش من شهر 11 ولحد دلوقت بيدوخه فية ويكفى الألفاظ اللى الواحد بيسمعها..
دمت بكل ود
من مصر
الأخ والصديق كريم الشيخ ..
سخريتك اللاذعة تطربني حقا ، وتجد هوىً شديدا في نفسي ...
لم أتوقف عن الضحك لحظة ، منذ أن بدأت القراءة وحتى انتهيت .. بالرغم من أني ما زلتُ متأثرا بآخر مقالات الرائع أحمد خيري ...
أسلوبك شيق وعرضك جميل وكلماتك ليّنة تستوعبها الآذان فورا ...
أريد فقط أن أصحح معلومة ، وهي أني لستُ غامضاً أبدا ، وسوف تبين لك الأيام صدق حديثي في ذلك ..
وبمناسبة المهمة الصعبة .. فليس بعيدا - وبعد ما كتَبتَه عليّ - أن أجد أدهم صبري بنفسه (مستخبي لي في الدُرَة)...
شكرا لك أيها الساخر لأجل هدف ، وإلى لقاء قريب بإذن الله تعالى ..
هيهيهيهيهي والله ضحكتني يا كريم ، و انا طول الوقت بقول يا ريتني كنت معكم بس بعد ما قريت البوست قلت منيح اني ما كنت و الا كنت طلعتني ببيع العالم و انا مو عارفه :-)
من مصر
الحمد لله انى ماجيتش
الله اعلم كنت هتقولى ايه هههههههههههه
بس حقيقى اسلوبك حلو وجميل
وانا تخيلت اللقاء كان ازاى حسيته حلو
ربنا يوفقك يارب ...
من مصر
أخي كريم :
سعدت بقراءة انطباعك عن اللقاء .. هو مختلف وتبدو فيه بصمتك وروح الفكاهة ..
أشكرك وأشكر كل من كتب عن اللقاء فقد حرمت منه لسبب خارج عن إرادتي .. المهم أنا لي عتاب عندك .. البانر الذي اخترته لي هو بانر الصرخة وشعارهم .. أرجو حذفه لأنهم اعتقدوا أني سرقت البانر بدلا من الوقوف معهم ..
دمت لي وتقبل تحياتي
من مصر
كريم
شوف يا سيدى
.
.
.
.
.
بس
هقول ايه بعد اللى قلته؟!
عموما الفرق بين الجنون والعبقرية شعره،
وكل واحد فينا كان فاكر التانى أكبر منه ... طلعنا أعيل من بعض يا مان..
ههه :)
وبخصوص ايمان أنا معايا تليفونها لو هتبلغ أنا ف الخدمة..
ايمان ..
مساء التعليقات الثورية
أنا بقترح نعفى عنها يا كيمو عشان بتقول علينا شبابنا لسه بخير .. شكلها متعرفش اللى فيها ...
بهزر .. احنا اللى فيها وهنفضل فيها!!
وعلى فكرة أحييكى على شجاعتك يا بطلة!
:)
من مصر
بقى كده يا كريم
ماشى يا عم
بقى أنا أقدر أبيعكوا برده
على العموم أنا من مبادئى إنى صح لغايه ما غيرى يثبتلى أنى غلط
سلام يا باشا
تحياتى ليك .....
من مصر
الغالية علياء
أنا مقدرش أطنش إجتماع زي كده لإن كنت حاسس انه فيه حياتي
من مصر
أستاذ نعماني ويا اصحابي واخواني الكرام العمر واحد والرب واحد انا مش بخاف الا من اللي خلقني ومتخافوش والله انا رايح بكرة مكتب امن الدولة لو مرجعتش يبقى اطمنوا عليا اوكي
من مصر
أخى العزيز كريم
أنا غيرت أبعاد الصورة وعملتلك الخلفية
http://www3.0zz0.com/2007/02/10/15/25418429.gif
دة رابط رأس المدونة خلى تحت منطقة الهيدر الطول 200
http://www3.0zz0.com/2007/02/10/15/68852251.gif
http://www3.0zz0.com/2007/02/10/15/33360845.gif
والرابطين دول للخلفية أختار منهم اللى يعجبك وإن كنت أرجح الأول لأنه أخف
ولو عايز أى حاجة تانى قول
دمت بكل ود
من مصر
ابنى الغالي كريم
لا ادري ما أقوله لك
لكن كل ما أدريه هو اننى اريد كلل ايامي مقابلة
اريد الحياة بينكم جميعا
شعرت بكم أهلي وأحبائي
كل شخص هو جزء منى
احببتكم جميعا
يعجز كلامي عن التعبير عما بداخلي
انا اعرف انك ستقرأ ما بين السطور
لك كل الاماني بحياة كلها عمل وجمال وسعادة
من مصر
وأهون عليكي يا نسمة انا اللي ناوي أأكلك محشي شبت خلاص انا هعلم جينا ونبيلة وايمان وانتي لأ
من مصر
بجد بجد بجد دي معجزة انه بيدو يعلق لي على موضوع بقى له 6 شهور بيدخل ومعلقش اخيرا الا ع الموضوع ده ازغرط
لللللللللللللي
من مصر
اتمنى فعلا يا ايمان انك تكوني قد مسئولية الدين وان تكوني خير دليل للمسلمين وان تنفعينا يا رب
ومتقلقيش جايين قريب جدا
من مصر
شكرا لتعليقك يا فلانتين وان كنت لا احب طريقة الدعوة للزيارة الا اني دخلت فعلا مدونتك واتمنى انها مش تعجبني بس لأ تعجب كل الجيران
من مصر
الغالي محمد حسن اتمنى ان تكون في صحة جيدة في الاجتماع القادم بمشيئة الله
من مصر
الغالي محمد المهدي انا سعيد لأني حققت انجاز في تاريخ البشرية وهو اني خليتك تضحك وبجد اتمننى اني اكتشف محمد المهدي الحقيقي ويكون ظني خاطئ
من مصر
حلا الغالية اللي مش بتفكرني من السنة للسنة بجد نفسي اشوفك واتمنى انه تنزلي مصر في اقرب وقت ونعمل اجتماع خاص على حسابك .... متقلقيش انا هدفع تمن الايس كريم
من مصر
شكرا نوفا على تعليقك متقلقيش الدور عليكي وهجيبك هجيبك
من مصر
اسف يا ماجدة بجد بس انا حسيت ىانه نفس المضمون اعذروني اهل الصرخة وسأقوم بعمل بانر اخر قفي القريب وشكرا عل تعليقك الجميل
من مصر
هههههههههههه ماشي يا مادز يبقى نسميك ابو شعره ، وخلاص هنعفي عن ايمان
من مصر
عيييييييييييب يا نسر الشرق
كنت لسه عند امن الدولة بيحققوا معايا وعرفت انك انت اللي مبلغ وتقثول انا اقدر
هههههههههه
من مصر
محمد يا غالي تكرمليس بجد شكرا جدا ع المجهود الرائع ده
من مصر
ماما نبيلة
متقوليش حاجة يكفيني فخرا طلعتك البهية
من مصر
يا كريــــــــــــــــــــم :
ايه يابنى الى انت عامله ده ... هتودينا ف داهيه : )
جميل الاسلوبب ده بجد ... بس شيلهم من دماغك بقه الناس دى صابره عليك اوى ..... وربنا يزيد صبرهم كمان وكمان
ومتخفش انا مش هقول ان انت ناوى تعمل عمليه انتحاريه .... ههههههههههههه ..... وهتكون طبعا هنا فى على صوتـــــــــــــــــك ... هههههههههههه مش هقول حاجه خالص : )
ربننا يحفظك يا حاج
هيروووووووووووووو
من مصر
الغالي احمد هيرو متقلقش والله انا شكلي هعتزل علشان انا قطعت الخلف
من مصر
عزيزي كريم
آراء صائبة ..... بالغت انت في التعبير
مكتومة...... ربما
ولكن الأكيد انها لن تظل هكذا كثيرا
اشكرك لكلماتك
واشكرك لأنك "هتودينا في داهية"
لي عتاب بسيط
فنون تطبيقية ليست بالكلية الهينة
"نفسي تجرب ليلة من ليالي تقييماتها"
ولكني احاول ان اتقن قدر استطاعتي
في دراستي
وفي قراءاتي
وفي كتاباتي
وربما هذا ما يحول دون متابعتي للمدونة
ولكني ان شاء الله ساعود للتدوين
قريبا
من مصر
أخى الشقى كريم
الواحد لازم يفكر مليون مرة قبل ما يقابلك، نقدك لاذع وظريف..
أضحكتنى تعليقاتك أيها المدون المشاغب..
أنتظر تشريفك لمدونتى، فربما ربما تعجبك
من مصر
أخى الغالى كريم الشيخ:
ياه دا انا أتأخرت ازى المواصلات زحمه جدا عندك هههههههههههههههههه
وعلى ما وصلت لقيت موضوعين اتكتبوا
ارجو ان تعذرنى لعدم تواجدى تلك الفتره
لأنى لم ادخل النت نهائى
المهم
مقالك فعلا روعه ويستاهل كتيييييررررررر اوى
انت عرفت تجيبنى فى الصميم بس ممكن اسألك عرفت تظهر شخصيتى ( السوسه ) دى إزاى أنت وإيمان حسان
تعرف هو دا اللى هايحصل بالظبط
ما انت لو اخدت بالك هاتلاقينى جاسوس تبعهم هههههههههههههههه
بس انا ماقدرش اعمل كده واعطيهم خطه العمليه القادمه اللى اتفقنا عليها
هههههههههههههههه انا بضحك
اللهم لا حسد
احنا عندنا بطه ليها خمس صوابع
ههههههههههههه
دمت مبدعا متألقا
سلمت يداك وابدعت
من مصر
ههههههههههه
عبوووووووووووود
اية يا عمادده المواصلات خلصت خالص
بس بجد انت رائع وعظيم وانا عارف انك مش هتبلغ عننا وبعجدين عيب عليك هو انت هتحسدني
اهلا عيزة قول انو اول مرة اسمع بحاجة اسمها مدونة انا دخلت اول مرة صدفة وقريت مواضيعك عشان كنت بدور على مجلة اسمعا علي صوتك وللصدفة الجميلة قريت مواضيعك الي بتعالجها بطريقه حلوة شبابية يعني خلتني احس بروح الشباب فيك اصلي افتكرت انو كل جيلنا عجز المهم كنت عيزة قلك واصل في الي انت فيه وعيزين مواضيع جديدة في المدونة
ياسمين
أضف تعليقا
<<الصفحة الرئيسية
من مصر
اخويا كريم /
لو قولتلك ان مقالك هايل بس .. ابقى ظلمتو
بجد رائع عجبتنى طريقه معالجتك للاجتماع كانت جامده طحن
انا اساسا كنت فاكراك هطنش و مش هتكتب عنو فكانت مفاجاه ادخل عندك والاقى المقال ده
بجد كلماتك هايله و خليك كده على طول
ربنا معاك
ربنا يوفقك
ربنا يحميك